Veer Preens Fred en Preenses Marjo, oetverkaore door de Rieste um veur
ut seizoen 2023 euver ut Riesteland te regeren, proclameren, hiebie oos illef gebode:
Ten iersjte
Veer vinge ut un groete ier en zunt er bijzonder greutsj op dat veer
door de Rieste gevraog zunt, um euver ut Riesteland te moage regeere.
Ten twiede:
Veer bedanke ut veurige preensepaar Gaston en Manon en ut jeugpreensepaar Levi en Lynn
en alle angere preensepaare veur dee sjoene carnavalstied toen veer same gewoen carnaval mochte viere.
Ten dreide:
Veer bedaanke oos kinger Bart en Maud veur ut biessjtoon van os in de aafgelaope drukke tied en ut geheim houwe van os oetkomme. Veer zulle de kommende tied auch mit Mexx
veul hullep van euch nudig hubbe.
Ten veerde:
Veer bedaanke ut bestuur en de hofhouding veur alle hulp bie de veurbereidinge. Wat hubbe veer same genoote van de geheimhouding en de hints nao angere die os um de oere vlooge
es veer es bestuur en vrouluij same waore.
Ten viefde:
Aan de raad van illef en de vrouluij, es Preens zal ich auch gewoen es secretaris vaan de Rieste mien werrik blieve doon. Ich kin noe veur michzelf de plenning maake en blief euch mails schikke.
Ten zisde:
Jao, collega’s van Bergmans en Wijnen oet Nieswiller, ich bin preens bie de Rieste
en neet bie de Baagratte. Ut gokke eeder jaor is noe eindelik veurbie.
Ich zal euch op dur maondigmurrige neet in dur steek laote.
Ten zevende:
Veur de collega’s en keender op ut werrik zal ich ein picto carnavalplenning maake, meh zoonder mich kin deer ut auch goot redde. Polonaise loape hub veer aandere jaore good geoefent.
Ten achste:
Veer hubbe al e bietsje carnaval ervaring, es auwd jeugpreens van de Baagratte, en es secretaris zulle veer de taak es preensepaar vol euvertuiging oetveure en os veur de volle 100% inzette.
Ten neugende:
Veer wille eederein in Mergraote en aoch daoboete, eindelik weer unne geweldige,
onvergetelike, ouwerwetse Carnaval weunsje.
Ten tiende:
Veer weunsje dat alle luuj in Mergraote, groet en klein, mit der optoch mit gunt of kieke,
en same mit oos un carnaval moage viere vol sjpas en plezeer
Ten illefde:
Noe geit ut gebuure, vanaaf vanoavend goan veer veur in de Carnaval,
en veer roope: sjoene Carnaval.
