WOORD van de VEURZITTER

Eindelik is ut zoe wiet: d’r Vastenaovend sjteet veur de deur. Alle veurbereidingen zunt in volle gaank: neuj kostuums weure gemak, auw creaties weure opgebiemd, wages weure gebouwd en caffies verseerd. Alles kleurt roed geel en greun. Ut vilt op: gaans Mergraote is d’r klaor veur!

Veer gunt dan ooch de oetdaging aan um same mit alle preense, preensesse, raode van ellef en natuurlik alle carnavalsvierders oet ut Riesteland vanaaf d’r seniorenmiddig op goonstig veur de carnaval tot en mit eshgoonsdig, Mergraote te laote sjuddele op zing fundamente!

Same mit eur hulp mot dit zeker lukke. Want carnaval make veer nog ummer same… Wie mier ziele wie mier vreugde! Laot veer van carnaval 2011 un carnaval make oebie niemes an d’r kant blief sjtoun, edereen mit deed en oe edereen mit edereen plezeer mak.

Veer, es carnavalsvereiniging De Rieste, zunt gruutsj euch de iersjte editie van Mergraote Alaaf aan te beeje. Dit is e beukske mit unne roed, geel, greune leidraod veur carnaval 2011. Hiedeur wit deer wat in oos durrep te doon is. Meh ut is ooch e naosjlaagwerk oe veer in truuk kieke mit leuke foto’s, biezoonder luuj en verhaolkes oet de veurgaonde jaore. Veer hoope dat deer ut mit sjuus zoe veul plezeer zult leze es dat veer ut gemak hubbe.

Ooch wil ich van de gelegenheid gebruuk make um alle oondernummersj van Mergraote en umstreke te bedanke veur hun sjteun aan oos es vereiniging mèh zeker aan de Carnaval! en neet te vergete die luuj die oos mèt geholpe hubbe um dit beukske te maake.

Mergraote : gooi euch d’r deur en maak sjpass, zoedat veer eshgoonsdig wèr kinne zèhge: ut woar wèr un sjoen carnaval!

Rieste Alaaf, Mergraote Alaaf, Carnaval Alaaf!

Veurzitter Frank Dumont.